"Artıq zaman tələb edir ki, dopinqə qarşı effektli mübarizə aparaq" - YENİLƏNİB

Artıq zaman tələb edir ki, idmanda dopinqə qarşı mübarizədə fəaliyyətimizi dünyanın tələblərinə uyğunlaşdıraq və ona uyğun hərəkət edək.

14:24

Trend-in məlumatına görə, bunu Milli Məclisin Gənclər və idman komitəsinin bu gün keçirilən iclasında çıxış edən gənclər və idman naziri Azad Rəhimov "İdmanda dopinq vasitələrindən və üsullarından istifadəyə qarşı mübarizə" haqqında yeni qanun layihəsinin müzakirəsi zamanı deyib.

Onun sözlərinə görə, beynəlxalq aləmin dopinq sahəsindəki mübarizəsini nəzərə alaraq, Azərbaycan da bu sahədə üzərinə müəyyən öhdəliklər götürüb.

Nazir qeyd edib ki, Azərbaycan bu öhdəlikləri yerinə yetirmək istiqamətində fəaliyyət göstərməli, bu sahəyə öz töhfəsini verməlidir: "İdmanda dopinqə qarşı mübarizə sahəsində yeni qanun hazırlanması barədə Prezident İlham Əliyevə məruzə edilib və dövlət başçısı da öz növbəsində bildirib ki, hazırlanacaq qanun mükəmməl olmalı və idmançıların dopinqdən istifadəsini vaxtında aşkar etməyə imkan verməlidir, eyni zamanda elə etmək lazımdır ki, Azərbaycan idmanına ləkə gəlməsin. Azərbaycan böyük uğurlar əldə edib və bu uğurlar bundan sonra da davam etdirilməlidir. Odur ki, dopinqə qarşı ciddi mübarizə metodu hazırlanmalıdır".

A.Rəhimov bildirib ki, yeni qanunda bir neçə əsas məsələ öz əksini tapmalıdır: "Birincisi, qanun beynəlxalq standartlara cavab verməli, müstəqil Milli Antidopinq Agentliyi yaradılması, idmanda manipulyasiyaya yol verilməməsi, idmançıya hər hansı formada təzyiqlər və idmançıda dopinqin vaxtında aşkar olunması üçün lazımi maddi-texniki bazanın yaradılması öz əksini tapmalıdır. Çünki idmançılarda dopinqin aşakar edilməsi üçün ildə 700-800 növ testdən və müayinədən keçilməsi nəzərdə tutulur. Elə etməliyik ki, dopinqə qarşı effektli mübarizə apara bilək".

----------

14:23

"Azərbaycanda idmançıların dopinqdən istifadə edilməsini aşkar etmək məqsədi ilə müstəqil Milli Antidopinq Agentliyi yaradılır".

Milli.Az report-a istinadən bildirir ki, bunu gənclər və idman naziri Azad Rəhimov Milli Məclisin Gənclər və idman komitəsinin bu gün keçirilən iclasında "İdmanda dopinq vasitələrindən və üsullarından istifadəyə qarşı mübarizə" yeni qanun layihəsinin müzakirəsi zamanı deyib.

Onun sözlərinə görə, bu qurum beynəlxaq idman təşkilatlarının tələbinə əsasən yaradılacaq: "Yaradılacaq Milli Antidopinq Agentliyinə idmançılarda dopinqin aşkar edilməsi, onun mexanizmi, tibbi müayinələrin aparılması, testlərin tətbiq edilməsi, idmançıların dopinqdən istifadə ilə bağlı şikayətləri ilə bağlı məsələlər öz əksini tapacaq".

O deyib ki, hətta Milli Antidopinq Agentliyinin tərkibində apellyasiya şuralarının, arbitrajın yaradılması da nəzərdə tutulur.
A.Rəhimov bildirib ki, hazırda nazirliyin tərkibində belə bir qurum fəaliyyət göstərsə də, o, beynəlxalq anti-dopinq təşkilatları tərəfindən tanınmır.

Milli.Az