Bakı şəhəri Nizami rayonunda Qara Qarayev prospekti və Rüstəm Rüstəmov küçəsi təmir olunub.
"Azəravtoyol" ASC-dən Milli.Az-a verilən məlumata görə, hər iki yolda dağılmış və qabarmış hissələr mövcud idi. Bu isə öz növbəsində avtonəqliyyat vasitələrinin rahat hərəkətinə maneə yaradırdı. Artıq bu problem tam olaraq aradan qaldırılıb.
Təmir-tikinti işlərinin aparıldığı Qara Qarayev prospekti 6 hərəkət zolaqlı olmaqla uzunluğu 3 km, eni 24 metrdir.
Prospekt boyunca köhnə asfalt örtüyünün üst qatı frezlənərək kənara daşınıb, daha sonra yola yeni asfalt-beton örtük döşənib. Ümumilikdə yolun 72 min kv.m sahəsi asfaltlanıb.
Təmir-tikinti işləri çərçivəsində prospektin Nəsimi küçəsi ilə kəsişməsindən başlayaraq Nizami Rayon İcra Hakimiyyətinin qarşısından keçən uzunluğu 715 m, eni 11 m olan, həmçinin Şirin Mirzəyev və Rüstəm Rüstəmov küçələri arasında yerləşən uzunluğu 929 m, eni 15 m olan köməkçi yollarında da təmir işləri aparılıb.
Analoji təmir-tikinti işləri Rüstəm Rüstəmov küçəsində də aparılıb. Küçənin uzunluğu 1,9 km, eni isə 28 metrdir. Küçə hər bir istiqamətə 3 olmaqla, 6 hərəkət zolağından ibarətdir.
Qeyd edək ki, həm Qara Qarayev prospekti, həm də Rüstəm Rüstəmov küçəsi avtonəqliyyat vasitələrinin intensiv hərəkət etdiyi ərazidə yerləşməklə mühüm əhəmiyyətə malikdir.
Pünhan Mirzə
Milli.Az