Ölkə

Azərbaycanda bu sığorta şirkəti ləğv olundu

26 Avqust 2016 15:40
Baxış: 1 817
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Azərbaycan Maliyyə Bazarlarına Nəzarət Palatasının (MBNP) Direktorlar Şurasının 26 avqust 2016-cı il tarixli qərarına əsasən "Alfa Sığorta" ASC-nin sığorta fəaliyyəti üçün verilmiş lisenziyası ləğv edilib.

Milli.Az bildirir ki, Palatadan Trend-ə verilən məlumata görə, lisenziyanın ləğv olunmasına səbəb, son dövrlər "Alfa Sığorta" ASC-nin maliyyə vəziyyətinin kəskin pisləşməsi, aktiv və kapitalının itirilməsi, yetərli səviyyədə ehtiyat formalaşdırmaması və öhdəliklərini icra etməməsi olmuşdur.

Artıq bir müddətdir ki, "Alfa Sığorta"-dakı mövcud problemlərlə əlaqədar olaraq xüsusi nəzarət rejimi tətbiq edilirdi. Buna səbəb sığortaçının təsisçisi olan "Texnikabank"ın müflisləşməsi və bununla əlaqədar olaraq "Alfa Sığorta" ASC-nin maliyyə durumunun kritik vəziyyətə düşməsidir. Həmçinin, sığorta şirkətinin idarəetmə orqanlarının qeyri-prudent fəaliyyəti və qeyri-sağlam sığorta təcrübəsi "Alfa Sığorta"-nın maliyyə durumunun daha da pisləşməsi ilə nəticələnmişdi.

Sığortaçının öhdəliklərini artırması və sistemə əlavə risklər ötürməsinin qarşısının alınması məqsədilə cari ilin aprel ayından onun İcbari Sığorta Bürosunda üzvlüyü dayandırılmış və bütövlükdə, aktiv satışlarının qarşısı alınmışdı.

Palata aprel ayının sonundan "Texnikabank"ın ləğvedicisi təyin edilmiş Əmanətlərin Sığortalanması Fondu ilə birlikdə "Alfa Sığorta" ASC-nin sığorta portfelinin satışı vasitəsi ilə sağlamlaşdırılmasına cəhd etsə də, sığortaçının yetərli likvid aktivlərlə təmin olunmuş ehtiyatlarının mövcud olmaması səbəbindən bu mümkün olmadı. Sığortaçıya əlavə kapital inyeksiyası olmadan onun maliyyə durumunun qanunvericiliyin tələbləri səviyyəsində bərpasının mümkün olmadığını və müflis təsisçisininsə belə imkanlarının olmamasını nəzərə alaraq MBNP "Alfa Sığorta" ASC-nin lisenziyasını ləğv etmişdi.

Direktorlar Şurasının qərarı ilə "Alfa Sığorta" ASC-nə təyin olunan müvəqqəti inzibatçı 26 avqust 2016-cı il tarixdən vəzifələrinin icrasına başlayıb.

"Alfa Sığorta" ASC-nin bütün öhdəlikləri üzrə sorğular Xətai r-nu, Babək pr-ti, "Babək Plaza", Blok C ünvanında yerləşən müvəqqəti inzibatçıya göndərilə bilər.

Sığortalılar əlavə məlumat üçün Palataya (Tel: (012) 493-50-58 (dax. 414) və ya müvəqqəti inzibatçıya (Tel: (012) 440 07 07) müraciət edə bilərlər.

Milli.Az

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.