Ölkə

Azərbaycan otellərinin 1 gecəlik qiyməti - ŞOK

12 Fevral 2016 14:46
8 Şərh     Baxış: 6 636
VTB-də MİNİMAL FAİZ DƏRƏCƏSİ İLƏ NAĞD KREDİT 10.49%-dən

Azərbaycan lüks və bahalı otelləri ilə tanınır. Ən bahalı otaqlara sahib 5 ulduzlu otellər əsasən Bakıda daha çox olsa da, regionlardakı bəzi otellər də onlardan geri qalmır. Bahalı otellərdə ən çox maraq doğuran otaqlar isə "suit"lərdir. Burada qiymətlər digər lüks otaqlardan yüksək olur.

Milli.Az bildirir ki, fins.az regionlarda yerləşən 5 ulduzlu otellərdə ən bahalı otaqların qiymətlərini araşdırıb. Həmin araşdırmanı təqdim edirik:

"Şamaxı Palace Şərədil", "King suit" - 990 manat

Burada xüsusi otaq "King suit" sayılır, otaq otelin kənarında yerləşdiyinə görə, bütün pəncərələrdən gözəl mənzərə açılır. Nömrədə 3 yataq otağı, bir qonaq otağı var. Qonaq otağında kinoteatr, bilyard yerləşir. Hər yataq otağının hamamı var. Nömrənin hazırki endirimli qiyməti 850 manatdır, normalda isə qiymət 990 manatdır. Nömrənin sahəsi 315 kvadratmetrdir. Yeri gəlmişkən, "Şamaxı Palace Şərədil"lə toy məclisi keçirən cütlük də bu nömrədə qala bilər.

"Qafqaz Riverside Hotel", "Kral" otağı - 800 manat

"Qafqaz Riverside Hotel"ində ən bahalı nömrəsinin qiymətləri həftə içi və həftə sonu fərqli olur. Şərti olaraq "Kral" otağı adlanan nömrədə həftə içi bir gecəlik qiymət 660 manat, həftə sonu isə 800 manatdır. Nömrəyə bir yataq otağı, bir geniş qonaq otağı daxildir. Nömrənin sahəsi 150 kvadratmetrdir. Həmçinin nömrəyə sauna, rus hamamı və s. daxildir. Oteldə 4 belə nömrə var.

"Park Chalet", "Dublex" nömrə - 935 manat

"Park Chalet"də ən bahalı nömrə "Dublex" otaqdır. Otelin 7-ci mərtəbəsində yerləşən bu nömrə ikimərtəbəlidir. "Dupleks"in yuxarı mərtəbəsində iki yataq otağı var, birinci mərtəbədə isə böyük qonaq otağı, mətbəx var. Qonaq otağında kinoteatr da yerləşir. Hər mərtəbənin sahəsi 160 kvadratmetrdir. Nömrədə gecələməyin qiyməti həftə içi 855 manat, həftə sonu isə 935 manat olur.

"Ayan Palace Tovuz", "Kral dairəsi" - 1000 manat

Tovuzda yerləşən 5 ulduzlu "Ayan Palace"nin ən bahalı otağı "Kral dairəsi"dir. Nömrəyə 2 yataq otağı, bir böyük qonaq otağı və iclas otağı daxildir. Nömrənin bir gecəlik qiyməti 1000 manatdır.

"Qafqaz Sport Hotel", "Kral suit" - 1050 manat

Bu oteldə ən bahalı otaq "Kral suit"dir. Nömrədə bir yataq, bir də qonaq otağı, 2 hamam, cakuzi var. Otaqda 10-15 nəfərlik iş stolu var. Otağın qiyməti həftə içi 950 manat, həftə sonu 1050 manatdır. Nömrənin sahəsi 250 kvadratmetrdir.

"Qafqaz Resort", "King suit" - 1050 manat

Bu oteldə də ən bahalı nömrə 2 yataq otağı və bir qonaq otağı olan "King suit"dir. Nömrədə bir hamam içində isə cakuzi var. Nömrənin həftə içi qiyməti 850 manat, həftə sonu 1050 manatdır. Nömrənin sahəsi 256 kvadratmetrdir.

"Naftalan Hotel by Rixos", "Kral otağı" - 1150 manat

Naftalanda yerləşən bu otel əslində sağlamlıq turizminə xidmət məqsədilə işə düşsə də, bu, otel sahiblərinə ekstra bahalı nömrələr təklif etməyə mane olmur. Otelin ən bahalı nömrəsi "Kral otağı"dır. Nömrədə bir böyük yataq otağı, bir böyük uşaq otağı var. Sahəsi 262 kvadratmetr olan nömrədə kiçik ölçülü bir mühafizəçi və ya dayə üçün otağa da yer tapılıb. Bunlarla yanaşı, nömrədə mətbəx, hamam cakuzi, sauna da var. Otaqda qalanlara xüsusi xidmətçi xidmət edir. Otaqda qalmaq üçün iki nəfər 1150 manat ödəməlidir. Burada qalanlar üçün neft vannası və həkim müayinələri pulsuzdur.

"Qalaaltı", "King villa" - 1337 manat

Azərbaycanın ən müalicəvi istirahət mərkəzlərindən olan "Qalaaltı"da ən çox pulu villalara görə ödəyəcəksiniz. "King villa" 6 nəfərlikdir. Villanın özünün açıq hovuzu var. Bu fəsildə istifadə etməyəcəyinizə görə otel daxilindəki qapalı hovuzdan istifadə edə bilərsiniz. Villada 3 yataq otağı, qonaq otağı, bir geyinmə otağı, bir istirahət otağı və mətbəx var. Villanın sahəsi 450 kvadratmetrdir, qiyməti 1337 manatdır.

"Ramada Plaza Gəncə", "Nizami" suiti - 1500 manat

Əgər dahi şair bilsəydi ki, ölümündən 800 il sonra Gəncədəki ən bahalı otel nömrəsi onun adını daşıyacaq, yəqin ki, ölməz "Xəmsə"sində karvansara mövzusuna xüsusi diqqət ayırardı. Gəncədə yerləşən "Ramada Plaza" otelində ən bahalı otaq "Nizami suit"inə 2 yataq otağı, bir qonaq otağı, bir əlavə otaq və şəhərə baxan eyvan daxildir. Sahəsi isə 125 kvadratmetrdir. Suitin bir gücəlik qiyməti 1500 manatdır.

"Excelsior Hotel Shamkir", "Kral dairəsi" - 1 770 manat

"Excelsior"un Şəmkir versiyası dəbdəbəsinə görə, Bakıdakı "adaş"ından geri qalmır, o cümlədən qiymət məsələsində. Qərb bölgəsinin ən müasir otellərindən biri sayılan " Excelsior Hotel Shamkir"in ən bahalı nömrəsi "Kral dairəsi"dir. İkimərtəbəli olan bu nömrənin ümumi sahəsi təqribən 450 kvadratmetrdir. Otaqda 1 qonaq, 2 yataq otağı, 2 vanna otağı, mətbəx, bar var. Otel əməkdaşları əmin edirlər ki, nömrə ən bahalı və keyfiyyətli avadanlıqlarla təmin edilib. "Kral dairəsi"nin bir gecəlik qiyməti 1770 manatdır.

"Tufandag Mountain Resort Hotel", "King suit" - 2500 manat

Buradakı "King suit"də isə qiymətlər standartdır, məbləğ nə az, nə çox, düz 2500 manat. Nömrədə 3 yataq otağı, bir qonaq otağı, mətbəxi və kiçik bir iş otağı var. Oteldə bu nömrədə qalanlara xüsusi hörmət var - bu qədər pulu verirsinizsə, yalnız sizə xidmət göstərən xüsusi xidmətçi də ayrılır. Nömrədə sauna, türk hamamı, masaj otağı da var. Nömrənin sahəsi 520 kvadratmetrdir.

"Pik Palace", "Royal suit" - 2515 manat

Şahdağda yerləşən digər otel isə "Pik Palace"dir. Burada ən bahalı nömrə "Royal suit"dir. Nömrəyə bir yataq, bir qonaq otağı, əlavə olaraq bir balaca otaq və mətbəx daxildir. Ümumi sahəsi 200 kvadratmetrdən çox olan nömrədə həmçinin sauna və cakuzili hamam var. Qonaq otağındakı böyük televizorda isə 3D sinemaya baxa bilərsiniz. Nömrədə dağa mənzərəsi olan eyvan da var. Nömrənin həftə içi qiyməti 2425 manat, həftə sonu qiyməti isə 2515 manatdır. Yeganə təsəlli odur ki, bu nömrədə qalsanız, həftə içi xizək qiymətlərində 50%-lik endirim əldə edəcəksiniz.

"Şahdağ Hotel", "Prezident" otağı - 2795 manat

Elit kurort kimi təqdim olunan "Şahdağ" Qış-Yay istirahət Kompleksindəki otellər öz qiymətləri ilə bunu təsdiqləyirlər. İsveçrə iqliminə bənzəyən kompleksdə, elə qiymətlər də İsveçrədəki kimidir. "Şahdağ Hotel"ində ən bahalı nömrəsi "Prezident" otağı dır. Sahəsi 305 kvadratmetr olan nömrədə 2 yataq otağı, bir qonaq otağı, ofis, hamam və cakuzi var. Nömrənin bir günlük qiyməti 2795 manatdır. Amma hazırda bu nömrə üzrə endirim var - istəyənlər nömrəni 80 manat ucuz qiymətə götürə bilərlər - 2715 manata.

"Quba Rixos", "Kral suit"i - 4000 manat

Azərbaycanda "Rixos" brendinin ilk təmsilçisi olan otel gözəlliyi ilə yanaşı, qiyməti ilə də fərqlənir. Hotelin ən bahalı otağı "Kral suit"dir. Bura 3 yataq otağı, 1 iş otağı və 1 böyük lobbi daxildir. Lobbi qonaq otağı kimi də istifadə oluna bilər, otaqda bilyard da var. Bu otaqda türk və rus hamamları, şəxsi masaj otağı və sauna da var. "Quba Rixos"dakı "Kral suit" öz sahəsinə görə də, Azərbaycanın ən böyük otel nömrəsidir - 945 kvadrat metr. Bu Bakıda təqribən 10 ədəd 2-3 otaqlı evin sahəsidir. Suitin qiyməti isə 4000 manatdır.

"Mini-bar pullu imiş"

Qeyd edək ki, hotellərdəki qiymətlərin yüksək, bəzən isə inanılmaz yüksək olmasına baxmayaraq, onların əksəriyyətində qonaq olub. Bütün bahalı nömrələrin sakinlərinə oteldəki ümumi qapalı hovuz, fitnes mərkəzi kimi xidmətlər pulsuzdur, qiymətə səhər yeməyi də daxildir. Hərçənd, bəzi qaydalar təəccübləndirir. Belə ki, böyük qiymətlərə baxmayaraq otaqların heç birində mini-bar qiymətə daxil deyil.

Milli.Az

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.